Akda ni Trek | Inilatag ni Bundok
Alas tres ng hapon,
walang birtdeyan, walang batang naghanda ngunit
bakit may mga payaso na may malaking barya?
Sa likod ng mga balota, nag-aabrakadabra
Mga makinarya sa kamay ng watcher na siksik ang bulsa
Abusado ang mga walang hiya, tinatarian
ang mga isang kahig, isang tuka
Mula sa riles hanggang presinto
umabot ang aberya ng makina
ngunit mas mabilis pa sa trapik ng EDSA
ang biyahe ng mga boto ng masa
COMELEC na ginawang puta,
tinali at pinagtatampal ng limpak-limpak na pera
nananahimik at kausap ang sariling konsensya
habang nakikinig sa awiting bayan na
Marcos-Duterte, Diktador, Pasista
Isang tapat at malinis lang na halalan,
nang maliwanagan ang masa,
nang mahipan ko na ‘tong umuupos na kandila.